(1)Saka gjeld anke over lagmannsrettens fastsetjing av samfunnsstraff.
(2)A, fødd 00.00.1985, vart 14. juni 2019 sikta for kjøring i ruspåverka tilstand og plaging av offentleg tenestemann.
(3)Sør-Gudbrandsdal tingrett sa 2. juli 2019 tilståingsdom med slik domsslutning: «1. A, født 00.00.1985, dømmes for overtredelse av vegtrafikkloven § 31 første ledd, jf. annet ledd, jf. tredje ledd, jf. fjerde ledd, jf. § 22 første ledd og straffeloven § 156 annet ledd til fengsel i 21 – tjueen – dager. 2. A, født 00.00.1985, dømmes til en bot på 10 000 – titusen – kroner, subsidiært fengsel i 15 – femten dager. 3. A, født 00.00.1985, taper retten til å føre førerkortpliktig motorvogn for en periode på 2 – to – år og 4 – fire – måneder, jf. vegtrafikkloven § 33 nr. 1 jf. forskrift om tap av retten til å føre motorvogn § 3-2 nr. 2. Ved eventuelt gjenerverv av føreretten må hun avlegge full ny førerprøve, jf. forskrift om tap av retten til å føre motorvogn § 3-2 siste ledd.»
(4)A anka tingrettens dom til Eidsivating lagmannsrett. Anken gjaldt straffutmålinga.
(5)Eidsivating lagmannsrett sa 26. november 2019 dom med slik domsslutning: «I tingrettens dom, domsslutningen punkt 1, endres straffen til samfunnsstraff i 21 – tjueen – timer med en gjennomføringstid på 60 – seksti – dager, subsidiært fengsel i 21 – tjueen – dager.»
(6)Påtalemyndigheten har anka lagmannsrettens dom. Anken gjeld rettsbruken under straffutmålinga. Det er vist til at lagmannsretten har utmålt samfunnsstraff med 21 timar. Det følgjer av straffelova § 49 fyrste ledd bokstav a at minstestraffa ved samfunnsstraff er 30 timar. Lagmannsrettens dom må opphevast. Det er tilstrekkeleg at opphevinga gjeld dommen, ikkje også ankeforhandlinga.
(7)Forsvararen har ikkje hatt særlege merknader til anken eller til at berre dommen og ikkje ankeforhandlinga blir oppheva.
(8)Høgsteretts ankeutval viser til at ankeutvalet kan oppheve lagmannsrettens dom utan ankeforhandling når ankeutvalet samrøystes finn det klart at dommen heilt eller delvis bør opphevast, jf. straffeprosesslova § 323 tredje ledd bokstav a.
(9)Straffelova § 49 fyrste ledd bokstav a bestemmer at det i dom på samfunnsstraff kan fastsetjast ei samfunnsstraff frå 30 til 420 timar.
(10)Lagmannsretten har i saka her utmålt samfunnsstraff med 21 timar – og oversett minstestraffa på 30 timar i straffeloven § 49. Lagmannsrettens dom må opphevast.
(11)Påtalemakta har føreslege at berre dommen blir oppheva, og ikkje også ankeforhandlinga. Forsvararen har ikkje hatt innvendingar mot dette. Ankeutvalet finn at dette er ei tenleg løysing.
(12)Dommen er samrøystes.