Høgsteretts plenum kom til at fem av dommarane må vike sete under plenumsbehandlinga av to saker der spørsmålet er om likningane av reiarlag for 2007 byggjer på ei lovendring som er i strid med forbodet i Grunnlova § 97 om tilbakeverkande lover eller med vernet av eigedom i tilleggsprotokoll 1 artikkel 1 til den Europeiske menneskerettskonvensjonen.
(1)Dommar Utgård: Ankesakene nr. 2009/1575 Bergshav Tankers AS mot staten v/Finansdepartementet og nr. 2009/1663 Staten v/Finansdepartementet mot Bergesen Gas Shipping AS, BW Green Gas AS, AS Hektorgas, AS Havgas Partners, AS Centum, Edda Gas AS, Farstad Supply AS og Farstad International AS skal behandlast av Høgsterett i plenum. Sakene gjeld spørsmålet om likningane for desse reiarlaga for 2007 byggjer på ei lovendring som er i strid med forbodet i Grunnlova § 97 om tilbakeverkande lover eller med vernet av eigedom i tilleggsprotokoll 1 artikkel 1 til Den europeiske menneskerettskonvensjonen.
(2)Under saksførebuinga har dommarane Gjølstad, Coward, Bruzelius, Matheson og Webster teke opp spørsmålet om habiliteten sin. Dei har alle rekna seg som inhabile til å dømme i sakene, likevel slik at dommar Webster først stilte spørsmålet ope før ho seinare kom til at ho reknar seg som inhabil.
(3)Under rettsmøtet til behandling av habilitetsspørsmålet hadde ingen av partane merknader til det synet som dommarane Gjølstad, Coward, Bruzelius og Matheson hadde på eigen habilitet. Staten slutta seg i rettsmøtet til dommar Websters syn om at ho er inhabil, medan dei private partane – reiarlaga – vurderte det slik at ho ikkje er inhabil. Dommar Webster har etter rettsmøtet uttala seg ytterlegare, og også reiarlaga meiner no at dommar Webster er inhabil. Både staten og reiarlaga har godteke at habilitetsspørsmåla kan avgjerast utan nytt rettsmøte, sjølv om det er innhenta ny uttale frå dommar Webster.
(4)Eg går no over til å gi uttrykk for mitt syn på habilitetsspørsmåla.
(5)Dommar Gjølstad er gift med ekspedisjonssjefen i skatte- og avgiftsavdelinga i Finansdepartementet. Det er opplyst at han har hatt med den aktuelle skattelovendringa å gjere. Dommar Gjølstad må etter dette vike sete, jf. domstollova § 108.